Управата за заштита на културното наследство донесе акт со кој ислахането во Битола, објект од крајот на 19 век е ставен под привремена заштита, соопшти Министерството за култура. Според Заводот за заштита на спомениците на културата и музеј од Битола, објектот е културно наследство што заслужува да биде заштитено поради своите историски, културни и научни вредности. Со актот за привремена заштита се утврдуваат границите, контактната зона и режимот на заштита на објектот. Привремената заштита трае една година. За тоа време битолскиот Завод и музеј треба да изготви елаборат за валоризација со кој ислахането ќе биде трајно заштитено како културно наследство.
Ислахането во Битола / Фото: Министерство за култура
– Ислахането е дел од старите турски училишта и академии во Битола каде што професори биле познатиот Тефик-беј и Данали-ефенди со нивните ученици Кемал Ататурк и Али Фести-беј. Училиштето започнало да работи околу 1900 година и било финансирано со државни средства. Во него се школувале деца кои биле сираци или од сиромашни семејства, така што истовремено функционирало и како сиропиталиште и како училиште – велат од Министерството за култура.
УСЛОВИ ЗА ПРЕЗЕМАЊЕ
Текстовите, фотографиите и останатите материјали што ги објавува Умно.мк се авторски. Крадењето авторски содржини е казниво со закон. Бесплатно преземање е дозволено исклучиво на 20 отсто од содржината со задолжително цитирање на медиумот и хиперлинк до оригиналната содржина на Умно.мк.
